तिलविक्रम थेवे /एचकेनेपाल डट कम-
कतार, ८ पौष। हलिउड, बलिउडको नक्कल गर्दै कलिउड भनेर नेपाली चलचित्र उद्योगलाई सम्बोधन गर्ने गरिएको शब्दलाई नै टपक्क टिपेर नेपाली चलचित्र भित्रकै सेरोफेरोमा रहेको कथावस्तुलाई आकर्षक प्रस्तुतिका साथ चलचित्रमा उतारिएको नेपाली चलचित्र “कलिउड” आगामी जनवरी ११ मा सर्वप्रथम कतारबाट ग्रयाण्ड प्रिमियर सो सहित नेपाल र सम्पूर्ण विश्व नेपाली संसारभरी रिलिज हुने भएको छ।
सो कुरा गत विहीवार कतारस्थित ग्रयाण्ड कतार प्यालेस होटलमा अन्तर्राष्ट्रिय कलाकार मञ्चद्धारा आयोजित सो चलचित्रका निर्माता, निर्देशक तथा कलाकारहरु सम्मिलित पत्रकार सम्मेलन तथा अडियो विमोचन कार्यक्रममा जनाइएको हो।
पत्रकार सम्मेलन मार्फत कतारमा रहेका नेपाली समुदायलाई कलिउड चलचित्रका वारेमा विस्तृत जानकारी गराउदै कतारकै व्यवसायी तथा अभिनेताद्धारा निर्माण गरिएको हुनाले कतारका नेपाली समुदायलाई पहिलो प्राथमिकता दिएर कतारबाट प्रथम चोटी चलचित्र रिलिज गर्ने मनसाय रहेको चलचित्रका निर्माता कतारमा स्थापित युवा व्यवसायी नरेन्द्र सेनले बताए।
चलचित्रमा सेन स्वयंले पनि अभिनय गरेका छन् भने कतारमा कार्यरत विष्णु कार्कीले पनि अभिनय गरेकाछन्। चलचित्रका निर्देशक नवराज आचार्यका अनुसार यस चलचित्रले कलिउड भन्ने गरिएको नेपाली चलचित्र उद्योगसंग सम्बन्धित विविध विषयलाई समेटेको छ।
नेपाल कतार अनलाइन डटकमका संपादक तथा ऐक्यवद्धता मासिकका कतार संयोजक पत्रकार तिलविक्रम थेवे, नेपाल कतार न्युजका संपादक तथा पत्रकार महासंघ कतार शाखाका सभापति रवि रोषी, कान्तिपुर सापताहिकमा आवद्ध पत्रकार दिपक पुडासैनी लगायतद्धारा चलचित्रसंग सम्बन्धित विविध विषयमा सोधिइएका प्रश्नहरुको जवाफ चलचित्रका निर्माता तथा अभिनेता नरेन्द्र सेन, निर्देशक नवराज आचार्य तथा कलाकार विष्णु कार्कीले दिएका थिए।
यस चलचित्रमा आर्यन सिग्देल, प्रियका कार्की, नरेन्द्र सेन, विष्णु कार्की, पायल थापा लगायतका कलाकारहरुले अभिनय गरेकाछन् भने, गायक संगीतकार कुन्ती–शीला पुत्री सुवानी मोक्तान, गायक गायिका उदय–मनिला पुत्री श्रेया सोताङ्ग, सो चलचित्रका गीतकार तथा संगीतकार प्रदिप बास्तोला लगायतको स्वर रहेको छ।
चलचित्रको प्रोमो र गीतहरु देखाइएको सो कार्यक्रममा जनप्रगतिशील मञ्च (एनपिपिएफ) का अध्यक्ष रमेश भट्ट, जनसम्पर्क समितिका सभापति विमल सुवेदी, नेपाल पत्रकार महासंघ कतार शाखाका सभापति रवि भट्ट रोषी, एनआरएनए आइसीसीका सचिव टिवी कार्की, एनआरएनए एनसीसीका प्रथम उपाध्यक्ष गुरुनारायण रानाभाट, सामाजिक अगुवा सागर नेपाल लगायत अन्य संघसस्थाले पनि शुभकामना दिएका थिए।
जनवरी ११ तारिख दोहा सिनेमा हल कतारमा ११ः३० बजे र दिउसो २ः३० बजे चलचित्र प्रदर्शनको शुभारम्भ गरिने उक्त कार्यक्रममा आएर नेपाली दाजुभाइ दिदीबहिनीहरुलाई कलिउड चलचित्र हेरीदिन समेत हार्दिक आव्हान गरिएको छ।
Join Us:
YouTube: http://www.youtube.com/HKNepal
Like Facebook Fan Page: http://alturl.com/uvemh
Twitter: http://alturl.com/ffko4
Google+: http://alturl.com/fsu8b
हामीसंगै रहनको लागिः फेसबुक | ट्विटर | गुगल प्लस
