एचकेनेपाल डट कम संवाददाता-
काठमाडौ, १० मंसिर । राष्ट्रिय प्रजातन्त्र पार्टीका अध्यक्ष पशुपति समशेर राणाले राष्ट्रपतिले तोकेको समय भित्रै विपक्षीहरुले आफ्नो तर्फबाट सहमतिको प्रधानमन्त्री दिने दावी गरेका छन्।
रिपोर्टर्स क्लब नेपालले आईतवार आयोजना गरेको साक्षात्कारमा उनले दुई दुई पटक नेकपा एमाले र एकीकृत नेकपा माओवादीले सरकारको नेतृत्व गरिसकेकोले अबको सहमतिको सरकारको नेतृत्व काग्रेसले पाउने विश्वास ब्यक्त गरे।
साक्षात्कारमा राणाले भने–एमाले र माओवादीले नेतृत्व गरिसकेकोले अब काग्रेसको नेतृत्व स्वभाविक हुन्छ। ६–६ महिनासम्म सहमतिको सरकारको लागि पहल गर्दा समेत सरकारले टेरपुच्छर नलगाएपछि राष्ट्रपतिले सहमतिको सरकार गठनकालागी बाध्य भएर आब्हान गरेको तर्क गर्दै उनले राष्ट्रपतिको कदम मुलुकलाई डेडलकबाट मुक्त गर्नका लागि बाध्यकारी भएको दावी गरे।
मुलुकमा लामो समयदेखि परेको राजनीतिक गाँठो फुकाउन राष्ट्रपतिद्धारा चालिएको कदमलाई कसैले पनि नकारात्मक रुपमा लिन नहुने भन्दै सरकारले पनि समस्या समाधानको हिसावमा सकारात्मक रुप्मा लिनु पर्ने बताए।
माओवादीमा पनि राष्ट्रपतिको कदमको विषयमा दुई धार रहेको दावी गर्दै उनले अध्यक्ष प्रचण्ड खेमा त्यसलाई लिएर आन्दोलन गर्ने पक्षमा नरहेको बताए। त्यसैले पनि सात दिनभित्र सहमतिको सरकार मुलुकले पाउने उनको विश्वास थियो। यद्यपि, उनले सात दिनभित्रमा सहमति नजुटे राष्ट्रपतिले दलहरुलाई सहमतिको लागि थप समय दिने विश्वास ब्यक्त गरे।
विगत छ महिनादेखि सहमतिको लाग नै प्रयास भएकोले अहिले बहुमतीय सरकार गठनको लागि प्रयत्न र सोच कसैले पनि राख्न नहुने उनको धारणा थियो।
हामीसंगै रहनको लागिः फेसबुक | ट्विटर | गुगल प्लस
