एचकेनेपाल डट कम संवाददाता-
काठमाडौ, १९ फागुन । एकीकृत नेकपा माओवादीका मुख्य सचेतक देबप्रसाद गुरुङले जेठ १४ गतेभित्र संविधान निर्माण गरेर जारी गर्न फेरि नयाँ सम्झौता गर्न दलहरु तयार हुनु पर्ने बताएका छन्।
रिपोर्टर्स क्लब नेपालले शुक्रवार आयोजना गरेको साक्षात्कारमा गुरुङले सात बुँदे सम्झौता शान्ति, संविधान र सहमतिको सरकारको विषयमा पूर्ण रुपमा काम गर्न नसकेको दावी गर्दै दलहरु फेरि नयाँ सम्झौता गर्न वा विवादित विषयलाई प्रक्रियाबाट अगाडि बढाउन तयार हुनु पर्ने धारणा राखेका हुन्।
उनले संविधान निर्माणको लागि समय कम भए पनि त्यसो हुन सके संविधान बन्ने सम्भावना भने जीवितै रहेको बताए।
गुरुङले शान्ति, संविधान र सहमतिको सरकार निर्माणको विषय अलग अलग रुपमा अगाडि बढ्नै नसक्ने ठोकुवा गर्दै सबै विषयलाई प्याकेजमै टुङग्याउने पर्ने धारणा राखे। उनले सेना समायोजनको प्रक्रिया एक्लै अगाडि बढ्न नसक्ने भन्दै सबै विषयलाई प्याकेजमै सहमति गरेर अगाडि बढ्न नसके शान्ति र संविधान निर्माणको काम हुनै नसक्ने ठोकुवा गरे। उनले भने- शान्ति प्रक्रिया अगाडि बढ्ने अनि अरु प्रक्रिय अगाडि नबढ्ने कुरा हुन सक्दैन। प्याकेजमै अगाडि बढ्नु पर्छ।
उनले राष्ट्रिय सहमतिको सरकार निर्माण गरेर संयूक्त प्रयासबाट मात्रै अहिलेको शान्ति र संविधान निर्माणको प्रक्रियालाई अगाडि बढ्न सक्ने भन्दै अहिलेको सरकारले यो प्रक्रिया पुरा गर्न नसक्ने संकेत गरे।
हामीसंगै रहनको लागिः फेसबुक | ट्विटर | गुगल प्लस
