सुदर्शन रञ्जित / एचकेनेपाल डट कम –
पोखरा, ११ भदौ । एनेकपा माओवादी कास्कीका पूर्व सभासद राजकाजी गरुङ करणले एयरर्पोट बनाउने ठेकेदारसंग पैसा लिएको स्वीकार गरेका छन्। आज पोखरामा पत्रकार सम्मेलनको आयोजना गरी उनले पार्टीको लागि पैसा लिएको बताएका हुन्।
माओवादी पार्टी कार्यलयमा गरिएको पत्रकार सम्मेलनमा कास्कीका इन्चार्ज झलकपाणी तिवारीले एयरपोर्ट बनाउने ठेकेदारसगं करणमार्फत पारटीले पैसा लिएको स्वीकार गरे।
कार्यक्रमा इन्चार्ज तिवारीले कति पैसा लिएको भने बताएनन्। उनले बजारमा चर्चा चलाए जस्तो ५० लाख कमिशन नलिएको जिकिर गरे। तिवारीले पाटिको लागि पैसा लिएको बताउदै आफ्ना नेता करणको बचाउ पनि गरे। पार्टीको लागि सहयोग लिएको हो कुनै नेताको लागि होइन उनले भने।
पोखरामा अन्तर्राष्ट्रिय विमानस्थल बनाउन माग गर्दै आन्दोलन चर्किरहेको बेला त्यसभित्रै भएको भ्रष्टाचार काण्डले दुईदिन देखि पोखरामा ब्यापक चर्चा पाएको छ। यो काण्डको रहस्योद्घाटन पोखरेलीहरुको माझमा नभई एमाओवादीको कार्यकर्ता भेलामा भएको थियो। शुरुमा एमाओवादीका कार्यकर्ताहरुलाई पनि रहस्यको पोको बनेको यो काण्ड विवादको घेराभित्र परेपछि मात्र सार्वजनिक हुन पुगेको हो।
सबैभन्दा पहिलो तथ्य यो काण्डको विषयमा एकीकृत नेकपा माओवादीका अध्यक्ष पुष्पकमल दाहाल प्रचण्ड र प्रधानमन्त्री समेत रहेका डा.बाबुराम भट्टराई पोखरामा प्रशिक्षणका क्रममा आउने बेलामा लिखित रुपमा नै उठेको थियो। गत साउन २८ गते एमाओवादीका राज्य समितिका सदस्य अमोदले प्रस्तुत गरेको मागपत्रमा पनि यस काण्डलाई उठाईएको माओवादी श्रोतले बतायो। यस विषयमा प्रश्न उठाउनुका पछाडि धेरै कारण रहेको एमाओवादीका कार्यकर्ताहरु बताउँछन्।
शुरुमा पूर्वसभासद् समेत रहेका एमाओवादीका राजकाजी गुरुङ ‘करण’ले एकलौटी ढंगले रकम असुली गरेको भन्ने हल्ला पार्टी वृत्तमा छाएपछि यस काण्डको रहस्य खुल्दै गएको एमाओवादीका कार्यकर्ताले बताए। उनले भने–‘शुरुमा पूर्वसभासद् करणले एकलौटी ढंगले रकम असुलेको भन्ने हल्ला चल्यो, पछि थोरै–थोरै रकम हो भन्दै जाँदा ५० लाख रुपैयाँसम्म लिएको थाहा भयो।’
यस काण्डको विषयमा गत साउन २८ गते आयोजना गरिएको प्रशिक्षण भेलामा एमाओवादीका महाधिवेशन आयोजक समितिका सदस्य एवम् तत्कालिन तमुवान राज्य समितिका सेक्रेटरी हरि अधिकारी ‘कुमार’ले एयरपोर्ट काण्डका विषयमा कार्यकर्ताहरुलाई यर्थाथ जानकारी दिएका थिए। सो प्रशिक्षण कार्यक्रममा एयरपोर्ट–काण्डको रहस्य खुलाउँदै कुमारले ५० लाख रुपैयाँ रकम ठेकेदारबाट ल्याएको स्वीकार गरेका थिए। उनले सो रकम एमाओवादीका विभिन्न जनवर्गीय संगठनहरुलाई बाँडिएको भन्दै हिसाब–किताब समेत सार्वजनिक गरेका थिए। प्रशिक्षण कार्यक्रममा सहभागी एक कार्यकर्ताले भने–‘कुमारले हामी सबैलाई यस विषयमा खुलस्त जानकारी दिदैं अन्यथा नलिन समेत आग्रह गरेका छन्।’
त्यसो त नयाँ विमानस्थल निर्माणको प्रारम्भिक चरणमा तारजाली र जमिन सम्याउने काममा मात्र झण्डै ११ करोड भन्दा बढि रकम खर्च भईसकेको छ। तिनै कार्यहरुमा सहभागी ठेकेदारबाट पूर्वसभासद् तथा विमानस्थल सम्बन्धी समस्या समाधान कार्यदलका संयोजक समेत रहेका राजकाजी गुरुङको नेतृत्वमा सो रकम ठेकेदारहरुबाट लिईएको एमाओवादीले स्वीकार गरेको हो।
हामीसंगै रहनको लागिः फेसबुक | ट्विटर | गुगल प्लस
