सन्तोष काफ्ले /एचकेनेपाल डट कम-
धरान, २६ साउन । सुरक्षा अंग र पत्रकारबीच आपसी सहकार्य, जवाफदेहिता र दायित्वबोध गराउन सके पत्रकारहरु सुरक्षित बन्दै जाने एक कार्यक्रमका वक्ताहरुले बताएका छन्।
रिपोर्टस क्लब नेपाल सुनसरीले शुक्रवमर इटहरीमा आयोजना गरेको सुरक्षित पत्रकारिता र सुरक्षा अंग, ‘दायित्व, जवाफदेहीता र सहकार्य’ विषयका अन्तरक्रिया कार्यक्रमका वक्ताहरुले त्यस्तो बताईएका हुन्।
कार्यक्रममा बोल्ने वक्ताहरुले पत्रकारिता क्षेत्र असुरक्षित हुंदा समग्र जनताको सूचनाको हक कमजोर बन्ने भएकाले सुरक्षित पत्रकारीता आवश्यक भएको बताएका थिए। कार्यक्रममा बोल्दै निवर्तमान पूर्वाञ्चल क्षेत्रीय प्रशासक तथा हालका वन मन्त्रालयका सचिव डाक्टर कृष्णचन्द्र पौडेलले सुरक्षामा कुनै कसुर नराख्न पूर्वका सुरक्षा प्रमुखहरुलाई निर्देशन दिए।
यस्तै, पूर्व क्षेत्रीय प्रहरी प्रमुख प्रहरी नायब महानिरीक्षक सुरेन्द्र शाहले पत्रकारको मात्र नभएर समग्र नागरिकको सुरक्षा गर्ने जिम्मा सुरक्षा अंगको भएको भन्दै नागरिकको सहयोगमा अपराध नियन्त्रण गर्दै सुरक्षा व्यवस्था कडा बनाउन अघि बढ्ने प्रतिबद्धता जनाए।
कार्यक्रममा नेपाल पत्रकार महासंघ पूर्वाञ्चल संयोजक मोहनकाजी न्यौपानेले पछिल्लो समय पत्रकारहरु विभिन्न कारणले असुरक्षित बन्दै गएको भन्दै सुरक्षा अंगहरु जिम्मेवार बन्नुपर्ने बताए। कार्यक्रममा सुनसरीको प्रमुख जिल्ला अधिकारी लक्ष्मण थापालगायतले बोलेका थिए।
रिपोर्टर्स क्लब नेपालका अध्यक्ष ऋषी धमलाले कार्यक्रममा २१ हजार राशीको पत्रकारीता पुरस्कारको समेत घोषणा गरेका छन्। पुरस्कार सुनसरीमा क्रियाशिल पत्रकारलाई आगामी बर्षदेखि वितरण गरिने जनाईएको छ।
विजय मिश्रको कार्यक्रममा पूर्वमा पत्रकारीताको अवस्थाका विषयमा पत्रकार विजय मिश्रको कार्यपत्र प्रस्तुत गरेका थिए। कार्यपत्रमा अग्रज पत्रकार कृष्ण अधिकारीले टिप्पणी गरेका थिए।
कार्यक्रममा पूर्वाञ्चल क्षेत्रीय प्रमुख पौडेल, नेपाल प्रहरीका पूर्वाञ्चल क्षेत्रीय प्रमुख शाह, शशस्त्रका पूर्व क्षेत्रीय प्रमुख सिंहबहादुर श्रेष्ठ, अनुसन्धानका पूर्वाञ्चल प्रमुख गणेश अधिकारी, सुनसरी, मोरङ र सप्तरीका प्रमुख जिल्ला अधिकारी, पत्रकार महासंघका पूर्वाञ्चल संयोजक न्यौपाने, सुनसरी, धनकुटा र सप्तरीका अध्यक्षहरु, रिपोर्टस क्लब नेपालका केन्द्रिय अध्यक्ष धमला लगायतको सहभागीता रहेको थियो। कार्यक्रम धनबहादुर पुरीको सभापतित्वमा भएको थियो।
हामीसंगै रहनको लागिः फेसबुक | ट्विटर | गुगल प्लस
