सोदिप थोप्रा लिम्बू/ एचकेनेपाल डट कम-
आशफोर्ड, केन्ट युके । सगरमाथा गोर्खा नेपाली समाज आशफोर्डको आयोजनामा प्रत्येक बर्ष खेलाइंदै आएको सगरमाथा कप २०१२ आगामी अगष्ट २५ गते शनिबार स्थानीय ग्रेटचार्ट फूटबल मैदानमा हुने भएको छ।
बेलायतभरिका नेपाली फूटबल क्लबहरुले सहभागिता जनाउँदै आएको उक्त प्रतियोगितामा बिगतझैं २५ देखि ३० वटा टिमहरुले प्रतिष्पर्धा गर्नेछन्।
सगरमाथा कपलाई सफलतापूर्बक सम्पन्न गर्न छलफलको लागि गत शनिबार समाजको कार्यालयमा सम्पन्न बैठकले कार्य बिभाजन साथै जिम्मेबारी बाँडफांड गरेको छ।
खेलाडी, दर्शक एबम पाहुनाहरुको सुबिधालाई मध्यनजर गरेर प्रशस्त मात्रामा लाइसेन्स प्राप्त सेक्युरिटी साथै स्वयंसेवकहरुको परिचालन गर्ने भएको छ। यसको अतिरिक्त ३ देखि ५ जना प्रहरी खेलकुद मैदानमैं खटिने र प्रहरीको पेट्रोल टीमले प्रतियोगिता भरि निरन्तर निगरानी गर्ने व्यवस्था मिलाइएको छ।
बैठकमा आगामी सेप्टेम्बर १ गते शनिबार स्थानीय साइमन चर्चमा सम्पन्न हुन् गईरहेको स्रष्टा सम्मान तथा समापन कार्यक्रमको बारेमा पनि छलफल भएको थियो। समाजका अध्यक्ष पोपिराज राईको अध्यक्ष्यतामा सम्पन्न उक्त बैठकको संचालन माहासचिब मोहन कृष्ण गुरुङले गरेका थिए।
हामीसंगै रहनको लागिः फेसबुक | ट्विटर | गुगल प्लस
