सौरभ श्रेष्ठ/ एचकेनेपाल डट कम-
प्रतिभावान कलाकारहरुको खोजी गर्ने उद्धेश्यले राजधानीको अनामनगरस्थित रेडलाइट इन्टरटेन्टमेन्ट प्रालिले नेपाल आइडल गर्ने भएको छ।
नेपाली सांगीतिक इतिहासमा छुट्टै ‘रियालिटी सो नेपाल आइडलको अडिसन आगामी भदौ १ गते धरानबाट शुरु हुने आयोजकले धरानमा पत्रकार सम्मेलन गरी जानकारी गराएको छ।
नेपालका प्रमुख १० वटा शहरबाट पहिलो चरणमा ५ सय आइडलहरु छनौट गरी आगामी बैशाखमा नेपाल आइडल छानिने आयोजक कमिटिका संयोजक प्रवीण किरातीले जानकारी दिए। ‘नेपाल आइडलका लागि ५ सय प्रतिभाहरुलाई अडिसनबाट छनौट गरेर काठमाडौ लैजान्छौं’ किरातीले भने, ‘गाउँघरमा लुकेर रहेको प्रतिभा देखाउने अवसर प्रदान गरेका छौं।’
पहिलो अडिसन धरानमा भदौ १ र २ गते हुने भएको छ । त्यसपछि काडमाडौं, हेटौंडा, दमक, इलाम, विराटनगर, नारायणघाट, बुटवल, पोखरा र बनेपामा अडिसन हुने आयोजकले जनाएको छ। असोज १९ गते छनौट चरण सकिने बताइएको छ।
यसअघि भइसकेका लिम्बुवान आइडल, धरान आइडल, पूर्वाञ्चल आइडलमा उत्कृष्ट स्थानमा पुग्नेलाई सिधै टप १० सम्म तान्न सकिने आयोजक कमिटीका सल्लाहकार तथा संगीतकार ओमप्रकाश राईले जानकारी दिए। करीब ५० लाख रुपैयाँ खर्च हुने अनुमान गरिएको कार्यक्रमको प्रायोजकको खोजी भइरहेको आयोजकले जानकारी दिए।
नेपालभरिबाट छानिएका भाग्यमानी नेपाल आइडलले नगद एक लाख, ट्रफी र प्रमाणपत्र पाउने छन्। यस्तै, पाँच लाख रुपैयाँबराबरको एल्बम निकालिने र चलचित्रमा गाउने मौकासमेत पाउने छन्।
दोस्रो हुनेले नगद ५० हजार र तेस्रो हुनेले २५ हजार पाउने छन्। सबैलाई चलचित्रमा गाउन अवसर दिइने आयोजकले जानकारी गराएको छ। टप टेनमा छानिएकाहरुलाई म्युजिक भिडियोसहितको गीति एल्बम निकाल्ने मौका दिइने भएको छ।
हामीसंगै रहनको लागिः फेसबुक | ट्विटर | गुगल प्लस
