एचकेनेपाल डट कम सम्वाददाता-
काठमाडौं, १२ फागुन । नइ प्रकाशनले अन्तर्राष्ट्रिय क्षेत्रका दुइ जनालाई २०६८ सालको नइ पुरस्कार प्रदान गर्ने घोषणा गरेको छ।
तीन लाख रूपियाँ राशिको नइ देरूख अन्तर्राष्ट्रिय पुरस्कार संयुक्तराज्य अमेरिकाका मानवशास्त्री प्रा.डा.टेड रिक्कार्डरीलाई प्रदान गरिने भएको छ।
झन्डै आधा शताब्दीदेखि नेपालीभाषा, संस्कृति, इतिहास र पुरातत्वसम्पदाजस्ता विषयमा गहिरिएर अनुसन्धान गरी अन्तर्राष्ट्रिय जगतमा नै नेपालको महिमा बढाउन योगदान पुर्याएवापत अमेरिकाको कोलम्बिया विश्वविद्यालयका प्राध्यापक डा. टेड रिक्कार्डीलाई सो पुरस्कार प्रदान गरिने नइ प्रकाशनका सदस्यसचिव नरेन्द्रराज प्रसाईद्वारा विज्ञप्तिमा जनाइएको छ। यो पुरस्कार विदेशी नागरिकलाई हरेक वर्षप्रदान गरिन्छ।
यसैगरी दुइ लाख रूपियाँ राशिको नइ देरूनीख अन्तर्राष्ट्रिय पुरस्कार भारत असमका प्रा. लीलबहादुर क्षेत्रीलाई प्रदान गरिने भएको छ।
छ दशकदेखि नेपालीसाहित्यका प्रमुख विधामा सृजनशील रही खासगरी ‘बसाइँ’ र ‘ब्रम्हपुत्रको छेउछाउ’ जस्ता बृहत नेपाली जनजीवनको महागाथा चित्रण गर्ने कालजयी उपन्यासकारका रूपमा प्रतिष्ठित प्रा.लीलबहादुर क्षेत्रीलाइ सो पुरस्कार प्रदान गरिने भएको हो। यो पुरस्कार नेपालीगोर्खाली मूलका विदेशी नागरिकलाई हरेक वर्ष प्रदान गरिन्छ।
नइ प्रकाशनले अन्तर्राष्ट्रिय पुरस्कार छनौटका लागि नेपाल प्रज्ञाप्रतिष्ठानका कुलपति बैरागी काइँलाको संयोजकत्वमा दार्जीलिङ, भारतका डा.इन्द्रबहादुर राई, लण्डन विश्वविद्यालयका प्रा.डा.माइकल हट, त्रिभुवन विश्वविद्यालयका प्रा.डा.सुरेन्द्र के.सी. र नरेन्द्रराज प्रसाई सदस्य रहेको निर्णायक समिति गठन गरेको थियो।
नइ प्रकाशनका अध्यक्ष इन्दिरा प्रसाईको अध्यक्षतामा बसेको विशेष बैठकले निर्णायक समितिको सिफारिसमा सो निर्णय गरेको हो। उक्त बैठकमा पुरस्कार संस्थापक खनूप्रुदे ‘रामबाबू’को पनि उपस्थिति थियो।
यी पुरस्कार २०६९ साल वैशाख २२ गते राजधानी काठमाडौंमा प्रदान गरिने छन्।
हामीसंगै रहनको लागिः फेसबुक | ट्विटर | गुगल प्लस
