एचकेनेपाल डट कम संवाददाता-
ललितपुर, १६ चैत । नयाँ प्रेमिका भेट्टिएपछि एक युवकले ५ हप्ताकी गर्भवती प्रेमिकाको हत्या गरेका छन्।
हत्याको आरोपमा ललितपुर प्रहरीले ललितपुर उपमहानगरपालिका वडा नं.३ मा डेरा गरी बस्ने २१ वर्षीय सौगात ढकाललाई पक्राउ गरेको छ। उनी कपिलवस्तु तौलिहवा नगरपालिका वडा नं.१ नयाँटोल निवासी हुन्।
प्रहरीका अनुसार ढकालले भक्तपुरको मध्यपुर ठिमी न.पा.वडा नं.१५ गठ्ठाघरकी २६ वर्षीया भावना कार्कीको हत्या गरेका हुन्। कार्की ललितपुर उपमहानगरपालिका १० ज्वागलमा डेरा गरी बस्दै आएकी थिइन्।
कार्कीको हत्याको खुलासा ५ दिनपछि मात्र भएको प्रहरीले जनाएको छ। उनी बस्ने कोठाबाट दुर्गन्ध फैलिएपछि स्थानीयले प्रहरीलाई खबर गरेको थियो। प्रहारीले कार्कीलाई उनको ओछ्यानमा मृत अवस्थामा फेला परेको थियो।
प्रहरीका अनुसार चैत्र १० गते करीव साढे १ बजे आमासहित भावनाको कोठामा पुगेका सौगात र भावनाबीच नयाँ प्रेमिकाको विषयमा विवाद भएको थियो। आमासंगै फर्केका सौगात घरबाट झोलामा खुकुरी लिएर करीव ४ बजे पुनः भावनाको कोठामा पुगी हत्या गरेका थिए।
हत्यापछि ढोकामा ताल्चा लगाएर सौगात फरार भएका थिए।
हामीसंगै रहनको लागिः फेसबुक | ट्विटर | गुगल प्लस
