शेखर चापागाईं / एचकेनेपाल डट कम-
युएई। मुलपानी इन्डोर क्रिकेट प्राक्टिस ग्राउण्ड निर्माण सहयोगार्थ युएइमा सत्य एण्ड स्वरूप लाइभ कन्सर्ट सम्पन्न भएकोछ।
नमस्ते ट्राभल्स एण्ड टुर्स दुबईको प्रस्तुतिमा युएइको बरदुबईस्थित होटेल होलिडे इन् मा गत ३० मे २०१४ मा सम्पन उक्त कन्सर्टमा अत्यधिक मात्रामा दर्शक तथा क्रिकेटप्रेमीहरुको उपस्थिती रहेको थियो। युएइमा सम्पन्न हुने विभिन्न साँस्कृतिक कार्यक्रमहरु भन्दा पृथक रुपमा प्रस्तुत गरिएको सत्य एण्ड स्वरूप लाइभ कन्सर्टले यहाँ रहेका सत्य र स्वरुपका फ्यान तथा क्रिकेटप्रेमी मनहरुलाई छोएको थियो।
“जहाँ छन् बुद्धका आँखा” बोलको गीतबाट गायक सत्यराज स्टेजमा प्रस्तुत हुंदा सम्पूर्ण उपस्थित दर्शकहरुलाई देशप्रेम प्रतिको भावनाले ओतप्रोत गराएको थियो। त्यस्तै गायक स्वरूप राज आचार्यले बहुचर्चित “धेरै माया दिदा रहेछन्” बोलको गीत गाउंदा केही दर्शकहरुको आँखा रसाएको थियो। सो अवसरमा सत्य र स्वरुपले आ-आफ्नो एकल प्रस्तुतिहरु तथा संयुक्त प्रस्तुतिहरु प्रस्तुत गरेका थिए। युएइमा लामो समयदेखि कार्यरत रचनाकार सरोज बस्नेतद्वारा रचना गरिएको “आमा मेरी आमा” बोलको गीतलाई गायक सत्य राजले प्रस्तुत गर्दा उपस्थित सम्पूर्ण दर्शकहरुको आँखा रसाएका थिए।
कार्यक्रममा क्रिकेट खेलप्रति समर्पित गीतको पनि सार्बजानिक गरिएको थियो। सत्य राज आचार्य र स्वरूप राज आचार्यको स्वर, संगीत र रचना रहेको तथा सन्तोष प्रसाईको परिकल्पना र निर्माणमा रहेको उक्त गीत सम्पूर्ण नेपाली तथा नेपाली क्रिकेट खेलाडीप्रति समर्पित रहेको गायक सत्य राज आचार्यले बताए। नेपाली क्रिकेट खेलको विकास तथा सम्बर्धन गर्न मुलपानी इन्डोर क्रिकेट खेल मैदान निर्माण सहयोगार्थ आयोजना गरिएको उक्त कन्सर्टबाट उठेको सम्पूर्ण रकम मूलपानि इन्डोर क्रिकेट खेल मैदान निर्माण समितिलाई प्रदान गरिने कार्यक्रम संयोजक सन्तोष प्रसाईले बताए।
युएइका स्थानीय गायक कलाकारहरु सुमन उदय, गोपीकृष्ण पंगेनी, रेखा घिमिरे, क्षितिज चिन्तनको प्रस्तुति रहेको उक्त कार्यक्रममा जुनु नेपालीले नृत्य प्रस्तुत गरेकी थिईन्।
हामीसंगै रहनको लागिः फेसबुक | ट्विटर | गुगल प्लस
