सोदिप थोप्रा लिम्बु / एचकेनेपाल डट कम-
आशफोर्ड युके / लिम्बुवान पांचथर पुर्खौली घर भई हाल अमेरिकामा बसोवास गर्दै आउनु भएका लिम्बू कलाकार आषिस लिङ्गदेनलाई किरात याक्थुङ चुम्लुङ युके र आशफोर्ड शाखाले संयुक्तरुपमा एक भब्य कार्यक्रमको आयोजना गरि स्वागत एबं सम्मान गरेको छ|
नायक लिङ्गदेनले नेपाली तथा लिम्बू भाषामा निर्मित थुप्रै फिल्म, नाटक लगायत अन्य विविध विधामा अभिनय गरि नेपाली तथा लिम्बू भाषा, साहित्य एबं संस्कृतिको विकासमा अमुल्य योगदान गर्नु भएको छ | उहाँले अभिनयको साथै टेलिभिजनमा ” सृजनाको संगालो ” नामक धाराबाहिक कार्यक्रम पनि संचालन गरि सक्नु भएको छ | कमान्डो, तिम्रो लागि, अंशबन्डा, कानुन , मुक्ति, क्रान्ति आदि उहाँ द्वारा अभिनित नेपाली फिल्महरु हुन् भने चेशुङ्ग, मसेमी लगायतका लिम्बू फिल्महरुमा पनि उहाँले अभिनय गर्नु भएको छ|
गत ९ मार्च २०१४ आइतवारका दिन शाखाका अध्यक्ष रै प्रसाद चोङ्गबाङ्गको अध्यक्षतामा सम्पन्न उक्त कार्यक्रममा प्रमुख अतिथि नायक आषिस लिङ्गदेन र उहाँका धर्मपत्नी नितु लिङ्गदेन रहेका थिए भने किरात याक्थुङ चुम्लुङ युकेका सल्लाहकार डम्मर सिंगक केन्द्रका प्रतिनिधिका रुपमा उपस्थित भएका थिए | जनजाति महासंघ बेलायतका अध्यक्ष श्रीप्रसाद साम्यु लिम्बू, मंच सम्बद्द संघीय लिम्बुवान राज्य परिषद युकेका अध्यक्ष लोकेन्द्र तबेबूङ्ग, विश्व साहित्य महासंघका अध्यक्ष विश्वासदिप तिगेला लिम्बू , समाजका बिशिष्ठ व्यक्तिहरु एबं सदस्यहरुको कार्यक्रममा बाक्लो उपस्थिति रहेको थियो|
संस्थाका तर्फवाट केन्द्रिय सल्लाहकार डम्मर सिंगक र शाखाका अध्यक्ष रै प्रसाद चोङ्गबाङ्गले प्रमुख अतिथिहरुलाई प्रमाण-पत्र सहित खादा ओढाई सम्मान गरेका थिए| सबैले यसरी नै आ-आफ्नो क्षेत्रवाट हाम्रो भाषा, संस्कृति, एबं परम्परा आदिको संरक्षण र विकास गर्न लाग्नु पर्ने कुरा उहाँले आफ्नो मन्तब्य राख्ने क्रममा राख्दै युकेमा प्राप्त न्यानो स्वागत एबं सम्मानले मलाई प्रबासमा नभई आफ्नै देश नेपालको लिम्बुवानमा भएको महशुस गराएको प्रष्ट पर्नु भएको थियो| किरात याक्थुङ चुम्लुङ युकेले भब्यरुपमा आयोजना गर्दै आएको सिसेक्पा तङ्नाम आफुले यु ट्युबमा हेर्दै आइ रहेको र मौका मिलाएर कुनै दिन प्रत्यक्ष हेर्न युके आउने रहर भएको पनि उहाँले भलाकुसारी गर्ने क्रममा जानकारी गराउनु भयो|
शाखाका सचिब काजी लिम्बूले संचालन गरेको उक्त कार्यक्रमको अन्त्यमा अध्यक्ष चोङ्गबाङ्गले सम्पूर्ण उपस्थित महानुभावहरुलाई धन्यवाद दिंदै औपचारिक कार्यक्रमको समापन भएको जानकारी गराए पश्चात प्रमुख अतिथिहरुसंग भलाकुसारी एबं फोटो खिच्ने कार्यक्रम राखिएको थियो | कार्यक्रममा गाउले पसलले खानाको बन्दोवस्त मिलाएको थियो | कार्यक्रम बेलुकी ६ बजे शुरु भएर १० बजे समाप्त भएको थियो|
हामीसंगै रहनको लागिः फेसबुक | ट्विटर | गुगल प्लस
