किन रोए हुन् बीके पाल्पाली ?
इन्दिरा प्रसाई-
बीके पाल्पाली !
अध्ययन र अनुसन्धानमा
सिर्जना र अनुशासनमा
सँधै अब्बल र दक्ष युवाको नाम हो ।
कसैलाई र कहिल्यै पनि
नाई र हुन्न भन्न नजान्ने
बीके पाल्पाली !
एउटा जाँगरिलो र सहयोगी
युवाको नाम हो ।
यसबेला आफूले आफैंलाई
नाइनाई र हुन्नहुन्न भन्नु पर्दा
भरखरै संसार बुझदै गरेको
भरखरै संसार चिन्न थालेको
निरीह शिशुसरह
घुँक्क, घुँक्क रोइदिए बीके पाल्पाली !
हो साँच्चो कुरा हो
रोएका त हुन बीके पाल्पाली
नमीठोसँग भक्कानिएकै हुन् बीके पाल्पाली
तर किन रोए हुन् बीके पाल्पाली –
किन भक्कनिए हुन् बीके पाल्पाली –
बीके पाल्पाली !
स्वाभिमानी शिर झुकाउँनु परेको
अनुभूतिले पो रोए हुन्
बीके पाल्पाली !
तरुनी स्वास्नीको संभावित रित्तो सिउँदो
कल्पेर पो रोए हुन् ।
बीके पाल्पाली !
सानी छोरीका अघिल्तिर
बलियो संरक्षकत्वविहीन
अजङ्ग उभिएको पहाडजस्तै
उदाङ्गो भविष्य सम्झेर पो रोए हुन् ।
बीके पाल्पाली !
लुला हुँदै गएका
अहिलेका आफ्ना पाखुरालाई
हिंजोसम्म दिनरात युद्धरत
बलिया आफ्ना अवयवसँग
तुलना गर्दै पो रोए हुन् ।
तपस्वी जीवनका प्रतीक
बीके पाल्पाली !
कहिल्यै अक्षरहरुसँग
सङ्गत नभएका
विद्वताको अर्थसँग
कुनै सरोकारै नभएका
आफ्नै देशका हूलका हूल
मनमौजी ल्याप्चेहरुको
शानशौकतका माझ
आफ्नै मात्र पुस्तौंपुस्ताको सुखसयल खातिर
डटेका, खटेका र रमाएका
मैँ हुँ भन्ने राष्ट्रघाती अघिल्तिर
आफूलाई फगत् भौतिकताको बाढीपैरोले
बगाउँदा रोए हुन् बीके पाल्पाली ।
धन र केवल धनको
सँधै वेवास्ता गर्दै आएका
सच्चा साधक बीके पाल्पाली !
आज उसै मायाको रापले
भत्भति पोलिरहँदा पो रोए हुन्
आफ्नै प्यारो देशको दुर्भाग्यमा
आफूसमेत खामिएर
असाध्य रोगको भूँइचालोले
अनायस किचिइँदा
सँधै अविचल उभिएका बीके पाल्पाली !
अत्यासिएर रोए हुन् ।
आफू मात्र नभएर
आफ्नै सहकर्मीहरुको
निरीह भविष्य कल्पँदै
त्यसैले पो रोए हुन्
राष्ट्र निर्माणको महायज्ञमा
अहोरात्र डटेका र खटेकार्
कर्मयोद्धा बीके पाल्पाली !
निजी स्वार्थको घेराबन्दीमा
बाँचेको देशको नागरिक हुनुको पीडामा
थिल्थिलिएका बीके पाल्पाली !
आफ्नो निरीह देशको
भविष्य सम्झेर रोए हुन् ।
सँधै कर्मठताका प्रतीक बनेर
अनवरत सङ्घर्षशील बीके पाल्पाली !
कहिल्यै घामका किरणहरु नछिर्ने
स्वच्छ वायुको कल्पनै हुन नसक्ने
डेराको एउटा विचरा कोठामा
सुदुर टाढाटाढासम्म
आफ्नो देश उजेलिने
कुनै सङ्केत नदेखेपछि
आफूमात्र नभएर
आफैंजस्ता अनगिन्ती साधकहरुको
असुरक्षित भविष्य सम्झँदै
आफैँ सरहको पीडाबोध गर्दै
रोए हुन् बीके पाल्पाली !
आफू दुखेको भन्दा पनि
आफ्नो मात्रृभूमी दुखेको रन्कोले
भक्कानिए हुन् बीके पाल्पाली ।
पुरस्कार थाप्दाथाप्दै पनि
भक्कानिए बीके पाल्पाली
मुटु वह खोलिखोलि
रोइदिए बीके पाल्पाली
युगौंदेखि सँगालेर राखेको
पीडाको पोखरी
छताछुल्ल पारेपछि
केही हलुङ्गो पनि भए हुन्
बीके पाल्पाली ।
# इन्दिरा प्रसाई
Join Us:
YouTube: http://www.youtube.com/HKNepal
Like Facebook Fan Page: http://alturl.com/uvemh
Twitter: http://alturl.com/ffko4
Google+: http://alturl.com/fsu8b
हामीसंगै रहनको लागिः फेसबुक | ट्विटर | गुगल प्लस
