एचकेनेपाल डट कम संवाददाता-
चितवन, २४ फागुन। पृथ्वी राजमार्गअन्तर्गत दारेचोक-३ घोप्टे भीरमा गएराति भएको सवारी दुर्घटनामा परी दुईजनाको मृत्यु भएको छ भने दुईजना गम्भीर घाइते भएका छन्।
काठमाडौँबाट मुग्लिनतर्फ आउँदै गरेको बा२ख ६५६५ नम्बरको ट्रिपरले सोही दिशाबाट आउँदै गरेको बा४ख ४११९ नम्बरका कारलाई ठक्कर दिँदा सो दुर्घटना भएको हो। कार त्रिशूली नदी किनारमा खसेको जिल्ला प्रहरी कार्यालय चितवनले जनाएको छ।
मृत्यु हुनेमा नाम ठेगाना नखुलेका दुई पुरुष रहेका छन् भने घाइते दुईजना पनि पुरुष नै रहेको प्रहरीले बताएको छ।
घाइते दुईजनालाई उद्धार गरी उपचारका लागि भरतपुर ल्याइएको छ। कारलाई ठक्कर दिने ट्रिपर र चालकलाई नियन्त्रणमा रहेको प्रहरीले जनाएको छ। (रासस)
हामीसंगै रहनको लागिः फेसबुक | ट्विटर | गुगल प्लस
